Strategaeth 2030 Gwasanaeth Erlyn y Goron

Crown Prosecution Service 2030 strategy logo

Rhagair

“Ein nod yw sicrhau cyfiawnder drwy erlyniadau annibynnol, teg ac effeithiol.”

Mae Gwasanaeth Erlyn y Goron wrth galon y system cyfiawnder troseddol - mae’n gweithio gyda'r heddlu a'r llysoedd i ddod â throseddwyr o flaen eu gwell, cefnogi dioddefwyr a thystion, a gwneud ein cymunedau'n fwy diogel.

Ein nod yw cyflawni'r canlyniadau hyn drwy erlyniadau annibynnol, teg ac effeithiol. Mae'r strategaeth hon yn egluro sut byddwn yn gwneud hyn drwy gynyddu gallu, gwella ansawdd y gwaith ar achosion, lleihau oedi a chynyddu ymddiriedaeth.

Rydym yn parhau i weithredu mewn cyd-destun lle mae'r system cyfiawnder troseddol dan bwysau mawr. Mae ein llwyth achosion yn dal yn uchel, ac mae pobl yn aros yn rhy hir i gael cyfiawnder. Rydym yn benderfynol o wyrdroi’r sefyllfa hon, a drwy wneud hynny wella ein gwasanaeth i ddioddefwyr a'r cyhoedd yn gyffredinol. Rydym yn gwybod mai dim ond drwy weithio'n effeithiol gyda'n partneriaid yn y maes cyfiawnder troseddol y gallwn wneud newid ystyrlon a rhoi sylw i'r heriau cyffredin gyda'n gilydd. Byddwn hefyd yn sicrhau bod ein dull gweithredu yn cyd-fynd â blaenoriaethau'r llywodraeth yr ydym wedi cael cyllid ychwanegol ar eu cyfer, gan gynnwys mynd i'r afael â thrais yn erbyn menywod a merched - gan chwarae ein rhan drwy ddod â mwy o gyflawnwyr trais o flaen eu gwell.

Er gwaethaf y rhwystrau a wynebwn, mae llawer i fod yn obeithiol yn ei gylch - mae Gwasanaeth Erlyn y Goron yn sefydliad hyblyg ac ymroddedig.

Mae ymrwymiad ein pobl yn eithriadol, mae cyfleoedd enfawr i ni wella ein gwasanaeth yn barhaus, a phrofwyd dro ar ôl tro fod ein gallu i ymateb i'r heriau sydd o'n blaenau yn gweithio.

Drwy gyflawni'r newid a amlinellir dros y pum mlynedd nesaf, bydd ein sefydliad yn dod yn fwy effeithiol ac yn gweithio'n well gyda'n partneriaid yn y system cyfiawnder troseddol - gan ddarparu'r gwasanaeth gorau posibl i ddioddefwyr ac ennyn ymddiriedaeth y cyhoedd.

Stephen Parkinson, DPP, signature

Stephen Parkinson,
Cyfarwyddwr Erlyniadau Cyhoeddus

Ein gweledigaeth

Rydym yn un o’r partneriaid dibynadwy yn y gwaith o drawsnewid system cyfiawnder troseddol sy'n gwneud y cyhoedd yn fwy diogel.

Ein diben

Rydym yn Erlyn achosion troseddol sydd wedi cael eu hymchwilio gan yr heddlu a sefydliadau ymchwilio eraill yng Nghymru a Lloegr.

Mae Gwasanaeth Erlyn y Goron:

  • yn penderfynu

    pa achosion y dylid eu herlyn ar sail y Cod ar gyfer Erlynwyr y Goron.

  • yn darparu

    gwybodaeth, cymorth a chefnogaeth i ddioddefwyr a thystion dros yr erlyniad.

  • yn paratoi

    achosion ac yn eu cyflwyno yn y llys.

  • yn pennu

    y cyhuddiadau priodol mewn achosion mwy difrifol neu gymhleth ac yn cynghori'r heddlu yn ystod camau cynnar ymchwiliadau.

Cyd-destun

Mae ein gwasanaeth yn cael ei siapio'n llwyr gan y cyd-destun cymhleth yr ydym yn gweithredu ynddo, a dros y pum mlynedd nesaf bydd y system cyfiawnder troseddol yn wynebu byd sy'n newid yn gyflym. Er mwyn ymateb yn effeithiol, bydd angen i ni groesawu diwygiadau pwysig ac angenrheidiol ochr yn ochr â'n partneriaid.

Mae Gwasanaeth Erlyn y Goron yn wasanaeth cyhoeddus hanfodol, ac rydym wedi ymateb yn gyson i'r heriau enfawr rydym wedi'u hwynebu dros y deugain mlynedd diwethaf. Rydym yn un rhan o system cyfiawnder troseddol ehangach sy'n dod â gwahanol gyrff cyhoeddus at ei gilydd i sicrhau cyfiawnder i ddioddefwyr, tystion a diffynyddion.

Wrth i gymdeithas gael ei gweddnewid - boed hynny drwy ddeallusrwydd artiffisial, llai o ymddiriedaeth neu newidiadau o genhedlaeth i genhedlaeth mewn agweddau - mae gweithgarwch troseddol hefyd yn dal i ddatblygu. Mae'r newidiadau cyflym hyn yn arwain at risgiau newydd a chyfleoedd newydd, a rhaid i ni fod yn ymwybodol o'r ddau.

Yn y cyfamser, mae’r heriau parhaus yn ei gwneud yn anoddach inni wella ac yn cymryd mwy o amser, sefyllfa sy'n cael ei gwaethygu gan amgylchiadau ariannol heriol. Mae llai o bobl yn dewis gyrfaoedd ym maes cyfiawnder troseddol, ac er mwyn darparu'r gwasanaeth cyhoeddus gorau mae angen inni wneud mwy i ddenu a chadw'r doniau gorau.

Mae achosion yn dod yn fwy cymhleth, mae maint y dystiolaeth yn cynyddu'n gynt ac yn gynt, ac mae ein llwyth achosion yn dal yn llawer iawn uwch nag yr oedd cyn y pandemig.

Mae'r ffactorau hyn yn cyfyngu ar gapasiti yn y system ac yn golygu bod oedi'n gyffredin, a chaiff hynny effaith annerbyniol ar ddioddefwyr, tystion a diffynyddion.

Ond mae rhesymau dros fod yn optimistaidd hefyd. Mae cyfiawnder troseddol yn dod yn fwyfwy integredig, gyda gwell cydweithio a gwerthfawrogiad cynyddol o’n cyd-ddibyniaeth yn y system. Os gallwn ni weithio'n well gyda'n gilydd, gallwn fynd i'r afael â materion systemig, cyflawni blaenoriaethau'r llywodraeth, a chael llawer mwy o effaith.

Bydd ein hymrwymiad i welliant parhaus - gan gynnwys harneisio potensial technoleg - yn ein helpu i ymateb yn fwy hyblyg ac effeithiol i’r dyfodol doed a ddêl.

Bydd gweithio mewn ffordd fwy clyfar yn cyfrannu rhywfaint at roi i’n bobl y lle sydd ei angen arnynt i ganolbwyntio ar yr hyn rydyn ni'n gwybod sydd bwysicaf i'r cyhoedd: adeiladu'r achosion gorau posibl, rhoi i ddioddefwyr, tystion a diffynyddion y gwasanaeth y maent yn ei haeddu, a gweithio gyda'n gilydd i wneud ein cymunedau'n fwy diogel.

Ein gwerthoedd

  • Trin pawb gyda pharch

    Byddwn yn parchu ein gilydd, ein cydweithwyr a'r cyhoedd rydym yn eu gwasanaethu, gan gydnabod bod pobl y tu ôl i bob achos.

  • Bod yn onest ac yn agored

    Byddwn yn egluro ein penderfyniadau, yn gosod safonau clir ar gyfer y gwasanaeth y gall y cyhoedd ei ddisgwyl gennym ni ac yn bod yn onest os gwnawn ni gamgymeriad.

  • Bod yn annibynnol ac yn deg

    Byddwn yn erlyn yn annibynnol, heb ragfarn a byddwn yn ceisio sicrhau cyfiawnder ym mhob achos.

  • Ymddwyn yn broffesiynol ac anelu at ragoriaeth

    Byddwn yn gweithio fel un tîm, gan chwilio bob amser am ffyrdd newydd a gwell o ddarparu'r gwasanaeth gorau posibl i'r cyhoedd. Byddwn yn effeithlon ac yn gyfrifol gydag arian trethdalwyr.

Sut mae ein strategaeth yn gweithio

  • Nod strategol

    Yr amcan cyffredinol ar gyfer y strategaeth, a'r cyfeiriad ar gyfer y sefydliad.

  • Buddion

    Y gwelliannau mesuradwy mewn perfformiad pan fyddwn yn cyflawni un neu fwy o'n canlyniadau.

  • Canlyniadau

    Datganiadau i'r dyfodol a fydd yn nodi’r canlyniadau y byddwn yn eu cyflawni pan fyddwn yn llwyddiannus.

  • Blaenoriaethau strategol

    Elfennau hanfodol pob canlyniad, a ddefnyddir i alinio prosiectau a rhaglenni o dan y strategaeth.

Ein nod strategol

Rydym yn sicrhau cyfiawnder drwy erlyniadau cyhoeddus annibynnol, teg ac effeithiol

Buddion, Canlyniadau a Blaenoriaethau strategol

Buddion: Rydym yn cynyddu’r gallu ar draws Gwasanaeth Erlyn y Goron

Rydym am i bawb yng Ngwasanaeth Erlyn y Goron ffynnu a bod ar ei orau. Rydym yn buddsoddi yn ein pobl i sicrhau eu bod yn teimlo eu bod yn cael eu cefnogi, eu parchu a'u gwerthfawrogi am y gwaith a wnânt.

 

Mae gennym y doniau sydd eu hangen arnom i lwyddo

  • Rydym yn anelu at recriwtio a chadw pobl fedrus.
  • Rydym yn galluogi ein pobl i ddatblygu a symud ymlaen.
  • Mae gan ein pobl y sgiliau i addasu i amgylchedd sy'n newid.

Mae ein pobl yn teimlo eu bod yn cael eu gwerthfawrogi

  • Mae ein pobl yn ymroi i’w gwaith ac yn cael eu cymell ganddo.
  • Mae lles ein pobl yn gwella.

Mae ein pobl yn gynhyrchiol ac yn broffesiynol

  • Mae ein strwythurau sefydliadol a'n pobl yn hyblyg.
  • Mae ein huwch arweinwyr a'n rheolwyr yn cynnal ac yn sicrhau safonau a lefelau perfformiad Gwasanaeth Erlyn y Goron.
  • Rydym yn anelu at welliant parhaus ac mae’n rhan annatod ohonom.

Buddion: Rydym yn gwella ansawdd gwaith achosion

Mae gwaith achosion yn sail i bopeth a wnawn i sicrhau cyfiawnder i ddioddefwyr. Rydyn ni'n anelu i gyrraedd safonau ansawdd uchel a chynhyrchu achosion cryf.

 

Mae ein pobl yn cael eu galluogi i weithio'n effeithiol

  • Mae ein prosesau'n rhoi blaenoriaeth i ansawdd.
  • Mae Gwasanaeth Erlyn y Goron a'r heddlu yn gwella ansawdd ffeiliau gyda'i gilydd.

Mae ein pobl yn glynu wrth safonau cyfreithiol uchel

  • Rydym yn cynyddu’r gwerth ychwanegol a’r gafael sydd gennym ar bob achos.
  • Mae gan ein pobl sgiliau cyfreithiol cadarn.
  • Mae achosion yn cael eu paratoi a'u cyflwyno'n fedrus.

Buddion: Rydym yn lleihau oedi yn y system cyfiawnder troseddol

Drwy gydweithio'n effeithiol â phartneriaid, rydym yn mynd i'r afael ag oedi yn y system cyfiawnder troseddol gyfan er mwyn sicrhau canlyniadau amserol a chyfiawn i bawb.

 

Rydym yn gyrru ymlaen ag achosion ar amser

  • Mae ein technoleg a'n hoffer yn canolbwyntio ar y defnyddiwr.
  • Mae ein prosesau a'n trefn weithredu yn effeithlon.

Rydym yn hyrwyddo ac yn cefnogi system cyfiawnder troseddol sy'n gydweithredol

  • Rydym yn deall y galw yn y system cyfiawnder troseddol ac yn ei reoli ar y cyd.
  • Rydym yn gweithio gyda phartneriaid i allu cyfnewid data yn fwy effeithiol.

Buddion: Rydym yn cynyddu ymddiriedaeth yng Ngwasanaeth Erlyn y Goron

Rydym yn rhoi dioddefwyr wrth galon y system cyfiawnder troseddol gan hyrwyddo amgylchedd cefnogol, parchus a theg.

 

Mae dioddefwyr a thystion yn cael gwasanaeth cefnogol

  • Rydym yn ymgysylltu'n gydymdeimladol ac yn rhagweithiol â dioddefwyr a thystion, ac yn eu cefnogi i wneud eu rhan.
  • Rydym yn hyrwyddo ac yn galluogi agwedd gydgysylltiedig at gefnogi dioddefwyr yn y system cyfiawnder troseddol.

Rydym yn deg yn y ffordd rydym yn mynd i’r afael â’n gwaith

  • Rydym yn sefydliad gwrth-hiliol.
  • Nid oes lle i ragfarn yn ein penderfyniadau.
  • Rydym yn adlewyrchu'r cymunedau rydym yn eu gwasanaethu ar bob lefel.

Mae'r cyhoedd yn deall yr hyn a wnawn

  • Rydym yn glir ynghylch ein rôl, ein penderfyniadau a'n hannibyniaeth.
  • Rydym yn hyrwyddo ein llwyddiannau ac yn hawlio cyfrifoldeb dros ein camgymeriadau.

Byddwn yn mesur

y galw

  • data ar atgyfeiriadau, llwyth achosion a diwrnodau eistedd.
  • prydlondeb achosion a thasgau allweddol.

sicrwydd

  • data sicrwydd ar wneud penderfyniadau, ansawdd ffeiliau a chydymffurfiaeth.
  • cyflawni rhaglenni a gwireddu manteision.
  • amrywiadau mewn perfformiad.

adborth

  • agweddau'r cyhoedd at Wasanaeth Erlyn y Goron.
  • hyder yng Ngwasanaeth Erlyn y Goron drwy arolygon cenedlaethol swyddogol.

y gweithlu

  • profiadau ein pobl.
  • sut caiff ein pobl eu trin.
  • denu a chadw ein pobl mewn swyddi allweddol.

Easy read version of the Crown Prosecution Service 2030 strategy