Gweithiwr gofal iechyd wedi'i garcharu am ymosod yn rhywiol ar gleifion

Mae gweithiwr gofal iechyd a ymosododd yn rhywiol ar ddau glaf yn ystod archwiliadau meddygol wedi cael ei ddedfrydu i garchar yn Llys y Goron Merthyr Tudful.

Ymosododd Ieuan Crump, 27 oed, ar y menywod ar achlysuron gwahanol pan oedd yn gweithio yn Ysbyty'r Faenor yng Nghwmbrân.  Digwyddodd yr ymosodiadau pan oedd Crump yn cynnal sganiau ac archwiliadau fel rhan o'i swydd.

Gwadodd Crump yr honiadau ond, ar ôl clywed yr holl dystiolaeth, cafodd y rheithgor ef yn euog o naw trosedd o ymosodiad rhywiol.

Dywedodd Michael Jenkin o Wasanaeth Erlyn y Goron: “Fe wnaeth Ieuan Crump gamfanteisio ar y pŵer oedd ganddo dros ddwy fenyw pan oeddent ar eu mwyaf agored i niwed, er ei foddhad rhywiol ei hun.

“Roedd ei weithredoedd bwriadol a phwrpasol yn achos o dor-ymddiriedaeth eithafol.

“Roedd dewrder y ddwy fenyw wrth roi eu tystiolaeth i'r rheithgor wedi galluogi Gwasanaeth Erlyn y Goron i gyflwyno achos cryf, a arweiniodd at yr euogfarnau hyn, a diolchwn iddynt am eu cymorth.”

Dedfrydwyd Ieuan Crump ar 18 Rhagfyr 2025 i naw mlynedd o garchar a gorchmynnwyd iddo gofrestru fel troseddwr rhyw. Gosodwyd Gorchymyn Atal Niwed Rhywiol hefyd ynghyd â dau orchymyn atal amhenodol.