Cyhoeddwyd yn wreiddiol ar 24 Mehefin 2026

DIWEDDARWYD:

Mae'r pum diffynnydd sy'n weddill bellach wedi cael eu dedfrydu:

• Dedfrydwyd Sai Raj Manne i 27 mis o garchar
• Dedfrydwyd Molly Cooper i 30 mis o garchar
• Dedfrydwyd Callum Kelleher i 16 mis o garchar, wedi'i ohirio am 18 mis, a gorchmynnwyd iddo gwblhau 15 diwrnod o Ofyniad Gweithgaredd Adsefydlu
• Dedfrydwyd Laura Johhn i 20 mis o garchar, wedi'i gohirio am 2 flynedd, a gorchmynnwyd iddi gwblhau 20 diwrnod o Ofyniad Gweithgaredd Adsefydlu
• Dedfrydwyd Donna James i 24 mis o garchar wedi'i ohirio am 2 flynedd.

Mae aelodau o gang cyffuriau a saethodd fenyw yn farw mewn tŷ yn Nhonysguboriau wedi cael eu dedfrydu yn Llys y Goron Caerdydd.

Aeth Marcus Huntley, 21 oed, Melissa Quailey-Dashper, 40 oed, a Jordan Mills-Smith, 34 oed, i’r eiddo ar 9 Mawrth 2025. Roedd Melissa Quailey-Dashper wedi cael cyfarwyddyd i gnocio’r drws, a phan agorodd Joanne Penney y drws, cafodd ei saethu gan Marcus Huntley.

Roedd dyn arall, Joshua Gordon, 28 oed, yn aros amdanynt mewn car. Ef oedd arweinydd grŵp troseddu cyfundrefnol o Gaerlŷr ac roedd wedi bod yn rhan o’r gwaith o gynllunio a threfnu’r saethu. 

Plediodd Huntley yn euog i lofruddiaeth a chafwyd y tri pherson a oedd gydag ef yn euog o lofruddiaeth yn dilyn treial. 

Cafwyd pumed person, Renaldo Daniel Baptiste, 39, yn euog o lofruddiaeth yn dilyn treial am ei ran yn y gweithredoedd o saethu a chyrchu’r gwn, a chafwyd Kristina Ginova, 22, aelod arall o’r grŵp troseddu cyfundrefnol, yn euog o lofruddiaeth hefyd.

Digwyddodd y llofruddiaeth yn sgil dau grŵp troseddu cyfundrefnol yn ymladd yn erbyn ei gilydd dros y fasnach cyffuriau anghyfreithlon. Nid oedd gan y dioddefwr gysylltiadau uniongyrchol â’r naill grŵp troseddu cyfundrefnol na’r llall, ond roedd yr eiddo lle cafodd ei saethu yn cael ei ddefnyddio gan y ddau grŵp i fasnachu cyffuriau.

Cafwyd dau ddiffynnydd arall, Laura John, 23 oed, a Donna James, 51 oed, yn euog o gynorthwyo troseddwr – Jordan Mills-Smith – i adael yr ardal yn dilyn y llofruddiaeth.

Dywedodd llefarydd ar ran Gwasanaeth Erlyn y Goron: “Roedd y diffynyddion hyn yn barod i ddefnyddio trais yn erbyn masnachwyr cyffuriau eraill, ac arweiniodd eu gweithredoedd at farwolaeth drasig Joanne Penney. 

“Gweithiodd Gwasanaeth Erlyn y Goron yn agos gyda Heddlu De Cymru a chyflwynodd achos cryf i’r rheithgor i ddangos, er mai Huntley oedd yr un a daniodd y gwn, bod ei gyd-ddiffynyddion yr un mor euog o lofruddiaeth. 

“Er bod yr achos wedi dod i ben erbyn hyn, byddwn yn dal i feddwl am deulu a ffrindiau Joanne, sydd wedi dioddef colled dorcalonnus.”

Cafodd Joshua Gordon ei ddedfrydu i garchar am oes a'i orchymyn i wasanaethu o leiaf 32 mlynedd.

Cafodd Renaldo Daniel Baptiste ei ddedfrydu i garchar am oes a'i orchymyn i wasanaethu o leiaf 42 mlynedd.

Cafodd Marcus Huntley ei ddedfrydu i garchar am oes a'i orchymyn i wasanaethu o leiaf 30 mlynedd a 146 diwrnod.

Cafodd Jordon Mills-Smith ei ddedfrydu i garchar am oes a'i orchymyn i wasanaethu o leiaf 27 mlynedd. 

Cafodd Melissa Quailey-Dashper ei dedfrydu i garchar am oes a'i orchymyn i wasanaethu o leiaf 14 mlynedd. 

Cafodd Kristina Ginova ei dedfrydu i garchar am oes a'i orchymyn i wasanaethu o leiaf 12 mlynedd.

Bydd pump diffynnydd, Laura John, Donna James, Sai Raj Manne, Molly Ruth Cooper a Callum Kelleher, yn cael eu dedfrydu am droseddau sy’n gysylltiedig â’r llofruddiaeth ar 6 Gorffennaf 2026.