Mae dyn 34 oed a aeth â merch ifanc yn ei harddegau i garafán a'i threisio wedi cael ei dedfrydu yn Llys y Goron Abertawe.

Cerddodd Leon Kidner gyda’r ferch 15 oed i’r garafán ym Mhentywyn, Sir Gaerfyrddin, lle rhoddwyd alcohol a chanabis iddi.

Gofynnodd i’r ferch gael rhyw gydag ef a gwrthododd hi, ond pan syrthiodd i gysgu, fe’i treisiodd.

Cafodd Kidner ei gyhuddo o dair trosedd, yr oedd yn eu gwadu, ond ar ôl clywed yr holl dystiolaeth yn yr achos, cafodd ei ddyfarnu’n euog o’r tair trosedd.

Dywedodd Samantha Mainwaring o Wasanaeth Erlyn y Goron: “Roedd Leon Kidner wedi manteisio ar y sefyllfa er mwyn cael boddhad rhywiol.

“Defnyddiodd ei bŵer dros y ferch i’w meddwi, gan ei gwneud hyd yn oed yn fwy bregus i’w ymosodiad.

“Roedd tystiolaeth gref Gwasanaeth Erlyn y Goron i’r rheithgor wedi arwain at yr euogfarnau hyn, gan wrthbrofi honiad Kidner bod y gweithredoedd rhywiol yn gydsyniol.

“Roedd y dioddefwr wedi bod yn ddewr drwy riportio’r troseddau a chefnogi’r achos.

“Mae’r treisiwr hwn wedi dod o flaen ei well oherwydd ei chryfder hi.”

Cafodd Leon Kidner ei ddedfrydu ar 2 Mawrth 2026 i ddeng mlynedd o garchar, a Gorchymyn Atal Niwed Rhywiol am oes. Gorchmynnwyd iddo hefyd gofrestru fel troseddwr rhyw am oes a gosodwyd gorchymyn atal am oes.