Deliwr cyffuriau yn cael ei ddedfrydu am fasnachu bachgen yn ei arddegau

Mae deliwr cyffuriau o Dredegar wedi cael ei ddedfrydu am drosedd caethwasiaeth fodern ar ôl recriwtio bachgen yn ei arddegau i fod yn rhan o'i weithgareddau troseddol.

Roedd Tyler Barnsley, 18 oed, yn delio cyffuriau o gyfeiriad yn Nhredegar. Ar 27 Medi 2024, aeth yr heddlu ati i gynnal cyrch ar yr eiddo ac atafaelu canabis, ffonau symudol, cloriannau, bagiau bach sy'n cau, ac arian parod.

Pan ddadansoddwyd y ffonau, daethpwyd o hyd i negeseuon a oedd yn dangos bod Barnsley yn delio â chocên a chanabis a’i fod yn defnyddio bachgen 14 oed i ddanfon cyffuriau a chasglu arian ar ei ran yn ardal Blaenau Gwent.

Dywedodd Louisa Robertson o Wasanaeth Erlyn y Goron: “Roedd Tyler Barnsley yn gwybod ei fod yn recriwtio plentyn i fod yn rhan o'i weithgareddau troseddol peryglus, ac ni ddangosodd dim pryder am les y plentyn, dim ond meddwl amdano’i hun a’i elw o'r cyffuriau.

“Roedd yr ymchwiliad gan Heddlu Gwent yn caniatáu i Wasanaeth Erlyn y Goron gyflwyno achos cryf, gan arwain at Barnsley yn pledio'n euog.

“Mae defnyddio plant i elwa o weithgareddau troseddol yn wrthun, a bydd Gwasanaeth Erlyn y Goron yn erlyn y rheini sy’n gwneud hynny pryd bynnag y bodlonir ein prawf cyfreithiol.”

Cafodd Tyler Barnsley ei ddedfrydu i dair blynedd mewn Sefydliad Troseddwr Ifanc ar 25 Mehefin 2025 yn Llys y Goron Caerdydd.