Dau yn cael eu dedfrydu am glwyfo person ifanc yn ei arddegau drwy saethu dryll drwy flwch llythyrau

Mae dau ddyn a deithiodd o Fryste i Gaerdydd gyda dryll, ac a saethodd berson ifanc yn ei arddegau drwy flwch llythyrau, wedi cael eu dedfrydu yn Llys y Goron Caerdydd.

Aeth Efekan Karahan, 18, ac Ashley Corbin, 21, i’r cyfeiriad yn Pontprennau, Caerdydd, gyda dryll dau-faril wedi’i lenwi. Rhoddodd Karahan y dryll drwy'r blwch llythyrau a’i danio ddwywaith. 

Tarodd beledi'r dryll goesau person ifanc yn ei arddegau oedd yn yr eiddo, gan achosi anafiadau, ond nid amdano ef oedd y ddau yn chwilio. Rhedodd Karahan i ffwrdd, ynghyd â Corbin oedd wedi bod yn aros gerllaw.

Cafodd Karahan a Corbin eu harestio ym Mryste ar 16 Mehefin 2025 mewn cerbyd oedd wedi’i ddwyn.

Dywedodd Leighton Mawer o Wasanaeth Erlyn y Goron: “Roedd y ddau ddiffynnydd wedi cynllunio eu troseddau ymlaen llawn, gan gynnwys defnyddio arf tanio, a arweiniodd at anafu person yn ddifrifol. 

“Pan fo arfau tanio’n cael eu rhyddhau, mae’r canlyniadau yn aml yn angheuol, ond yn ffodus iawn, nid dyna oedd y canlyniad yn yr achos hwn. 

“Arweiniodd y dystiolaeth gref a gyflwynwyd gerbron Gwasanaeth Erlyn y Goron at bleon euog, ac at ddwyn y troseddwyr gerbron y Llys.”

Cafodd y ddau ddiffynnydd eu dedfrydu ar 13 Chwefror 2026. Cafodd Efekan Karahan ei ddedfrydu i wyth mlynedd a phedwar mis o ddalfa mewn Sefydliad Troseddwyr Ifanc gyda chyfnod trwydded estynedig o 18 mis. 

Cafodd Ashley Corbin ei ddedfrydu i chwe blynedd o garchar gyda chyfnod trwydded estynedig o dair blynedd.