Dedfrydu gang cyffuriau am gynllwyn i fewnforio canabis

Mae aelodau o grŵp troseddu cyfundrefnol a ddefnyddiodd wasanaethau danfon parseli i gludo lot fawr o ganabis i'r DU o UDA wedi cael eu dedfrydu yn Llys y Goron Caerdydd.

Datgelodd yr ymchwiliad mai Abubakr Khawar, 28, oedd yn gweithredu fel arweinydd y grŵp – yn rhoi cyfarwyddyd i bobl eraill dderbyn y parseli, neu’n nodi eiddo i'w defnyddio i dderbyn y parseli.

Byddai'r parseli wedyn yn cael eu hailddosbarthu i gyflenwyr a defnyddwyr eraill.

Llwyddodd Llu'r Ffiniau i ryng-gipio 327kg o ganabis a oedd i fod i gael ei ddanfon i eiddo a ddefnyddid gan y grŵp. Byddai gwerth y cyffuriau ar y stryd wedi bod tua £3.2 miliwn.

Dywedodd Jenny Hopkins o Wasanaeth Erlyn y Goron: “Roedd y grŵp hwn yn drefnus iawn ac yn hynod soffistigedig yn eu troseddu.

“Roeddent yn trefnu ac yn rheoli danfoniadau dros yr Iwerydd i oddeutu 80 eiddo yn y DU ac yna'n defnyddio rhwydwaith dosbarthu helaeth i symud y cyffuriau ymlaen.

“Roeddent wedi ceisio osgoi cael eu dal yn gyfrifol am eu troseddau drwy newid eu patrymau dosbarthu’n rheolaidd, ond cawsant eu dal serch hynny.

“Datblygodd Gwasanaeth Erlyn y Goron achos cryf o'r dystiolaeth, a arweiniodd at yr euogfarnau hyn.

“Mae'r achos hwn yn dangos ymrwymiad Gwasanaeth Erlyn y Goron a phartneriaid gorfodi'r gyfraith i chwalu cadwyni cyflenwi cyffuriau a dod â'r rhai sy'n ymwneud â throseddau cyfundrefnol difrifol o flaen eu gwell."

Plediodd y diffynyddion canlynol yn euog i ddwy drosedd, sef cynllwynio i fynd yn groes i adran 170 o Ddeddf Rheoli Tollau Tramor a Chartref 1979, a chynllwynio i gyflenwi canabis:

• Cafodd Abubakr Khawar ei ddedfrydu i wyth mlynedd o garchar
• Cafodd Abdu Husain ei ddedfrydu i chwech mlynedd o garchar
• Cafodd Mohammed Nural Hussain ei ddedfrydu i chwech mlynedd o garchar
• Cafodd Solomon Bertram ei ddedfrydu i 22 mis o garchar
• Cafodd Ceiron Jones ei ddedfrydu i 26 mis o garchar
• Cafodd Kyle Solowyk ei ddedfrydu i 34 mis o garchar
• Cafodd Andrew Pethers ei ddedfrydu i dair mlynedd o garchar
• Cafodd Daniel Marshall ei ddedfrydu i 32 mis o garchar.

Cafwyd y ddau ddiffynnydd canlynol yn euog o'r un troseddau ar ôl treial llawn:

• Dedfrydwyd Sean Montgomery i dair mlynedd a chwech mis o garchar
• Dedfrydwyd Steven Munroe i 32 mis o garchar.