Rydym yn lleihau oedi yn y System Cyfiawnder Troseddol
Drwy gydweithio’n effeithiol â phartneriaid, rydym yn mynd i’r afael ag oedi yn y system cyfiawnder troseddol gyfan er mwyn sicrhau canlyniadau amserol a chyfiawn i bawb.
Ein huchelgais yw lleihau oedi ar draws y system cyfiawnder troseddol, fel bod dioddefwyr a thystion yn cael canlyniadau amserol a chyfiawn. Drwy wella’r broses o hwyluso achosion yn gynnar, defnyddio offer digidol gwell a gweithio’n agos gyda’r heddlu a’r llysoedd, byddwn yn cwtogi amserlenni o’r dechrau i’r diwedd, yn lleihau ôl-groniadau ac yn gwella perfformiad cyffredinol y system.
| Byddwn yn mesur llwyddiant drwy ein Dangosyddion Perfformiad Allweddol: | Targed |
|---|---|
| Mae o leiaf 75% o’n hadolygiadau neu benderfyniadau ynghylch cyhuddo gwyrdd1 yn cael eu cwblhau o fewn 28 diwrnod, fel rhan o’n hymdrechion parhaus i wella perfformiad. | ≥75% |
| Mae o leiaf 87% o’n hadolygiadau neu benderfyniadau ynghylch cyhuddo coch2 yn cael eu cwblhau o fewn 3 awr, fel rhan o’n hymdrechion parhaus i wella perfformiad. | ≥87% |
| Bydd o leiaf 84% o’r datgeliadau cychwynnol yn cael eu cyflwyno cyn y ple a’r gwrandawiad paratoi ar gyfer treial, neu yn unol â chyfarwyddyd Llys y Goron. | ≥84% |
| Bydd o leiaf 95% o ddatgeliadau cychwynnol achosion yr erlyniad yn cael eu cyflwyno o fewn pum diwrnod i’r gwrandawiad cyntaf yn y llys ynadon. | ≥95% |
| Bydd ein System Rheoli Achosion Ddigidol graidd ar gael i’n pobl o leiaf 99.9% o’r amser gweithredol sydd wedi’i gynllunio. Bydd hyn yn mesur ein perfformiad digidol gweithredol gan fod y system yn hanfodol er mwyn i’n pobl allu darparu gwaith achos amserol ac osgoi oedi diangen. | ≥99.9% |
Eleni, byddwn yn lleihau oedi drwy:
- Defnyddio technoleg i gyflymu gwaith achos
- Gwella cysondeb a lleihau gwaith diangen
- Gweithio ar draws y system i leihau oedi gyda’n gilydd
| Rhaglen | Byddwn yn: | Erbyn: |
|---|---|---|
| Adnoddau Gwaith Achos yn y Dyfodol | Gwella offer digidol i reoli achosion mawr a chymhleth, gan gynnwys adolygu achosion a rheoli deunydd achosion, er mwyn symleiddio’r gwaith o baratoi achosion a lleihau oedi y gellir ei osgoi. | 31 Rhagfyr 2026 |
| Gwella’r offer yn ein Rhaglen Gwaith Achos sy’n helpu ein pobl i drefnu, paratoi a rheoli ein deunydd gwaith achos er mwyn arbed amser, gwneud y broses yn fwy cyson, a gwella ansawdd y gwaith achos. | 31 Mawrth 2027 | |
| Creu prototeip o Wasanaeth Briffio ac Ymgysylltu newydd i Adfocatiaid i ystyried a allwn wella’r ffordd rydym yn gwneud hyn, ac a allwn gyflwyno’r gwasanaeth yn ehangach i wneud y broses yn gyflymach, yn gliriach ac yn fwy dibynadwy er mwyn i achosion allu symud ymlaen yn fwy llyfn. | 31 Rhagfyr 2026 | |
| Esblygu Dulliau Cyhuddo | Gweithio gyda’n partneriaid i brofi ffyrdd symlach o adeiladu ffeiliau achos ar gyfer achosion llysoedd ynadon a Llys y Goron er mwyn gweld beth arall allwn ei wneud i wella effeithlonrwydd a lleihau oedi. | 31 Mai 2026 |
| Gwerthuso’r Prosiect Awdurdod Cyhuddo er mwyn i ni allu gweld pa mor dda mae’n gweithio, ac a oes modd i ni ei gyflwyno’n ehangach i symleiddio prosesau a lleihau oedi. | 31 Mai 2026 | |
| Cwblhau 7fed argraffiad Canllawiau Cyhuddo’r Cyfarwyddwr er mwyn ei gwneud yn haws i’n partneriaid ddeall beth sydd ei angen yn ffeiliau’r heddlu. Mae gwneud hyn yn iawn y tro cyntaf yn arbed cryn amser i ymchwilwyr ac erlynwyr ac yn sicrhau bod unrhyw waith ychwanegol ac oedi dilynol yn cael eu lleihau. | 31 Gorffennaf 2026 |