Rhagor o wybodaeth i ddioddefwyr a thystion
Mae’r CPS yn parhau i wneud cynnydd tuag at rannu’r weledigaeth.
- Gwneud i gyfiawnder dalu
- Adfocatiaeth fewnol
- Plant a phobl ifanc – Polisi’r CPS ynghylch erlyn achosion troseddol yn ymwneud â phlant a phobl ifanc fel dioddefwyr a thystion
- Cyfweliadau gyda thystion cyn treial: Côd ymarfer
- Adfocadau Dioddefwyr - Cyhoeddi Protocol Barnwrol
- Teithiau rhithwir i ddioddefwyr a thystion
Gwneud i gyfiawnder dalu
Gan weithio gyda’r heddlu, rydym yn benderfynol o sicrhau na fydd troseddu yn talu.
Fe ddaeth Deddf Elw Troseddau 2002 (POCA) i rym yn 2003. Dyma ei nod:
- rhwystro troseddwyr neu gyd-droseddwyr rhag gwyngalchu elw troseddau a mynd ati i ganfod a chosbi gwyngalchu o’r fath
- adennill arian a wnaed trwy droseddu neu y bwriedir ei ddefnyddio i droseddu, a’i ddefnyddio er budd y gymuned.
Dyma atgoffa pawb sy’n cyflawni trosedd er elw ariannol y bydd cael eu dal nid yn unig yn golygu’r risg o gael dedfryd o garchar, ond hefyd y bydd eu harian ac unrhyw asedau yn cael eu cymryd oddi arnynt.
Yn ystod 2005-06, llwyddodd y CPS i sicrhau dros 3,000 gorchymyn atafaelu oedd yn werth dros £87 miliwn.
Adfocatiaeth fewnol
Bydd erlynwyr modern yn cynnal eu hadfocatiaeth eu hunain fel mater o drefn. Bu ein Gweithwyr Achosion Penodedig yn mynd ati’n gyson i erlyn achosion yn gadarn a theg mewn llysoedd ynadon, ac mae erlynwyr heddiw yn magu mwy a mwy o brofiad yn Llys y Goron.
Gan ddwyn yr enw Adfocadau Llys Uwch (HCA), mae’r cyfreithwyr a’r bargyfreithwyr hyn wedi cael hawliau arbennig i ymddangos mewn llysoedd uwch.
Bydd cronfa ddawnus y Gwasanaeth o adfocadau mewnol yn mynd ati fwyfwy i ddefnyddio eu doniau mewn treialon sy’n parhau’n hwy ac sy’n gynyddol gymhleth.
Dyma un o seiliau gweledigaeth y Cyfarwyddwr Erlyniadau Cyhoeddus y bydd y CPS yn wasanaeth erlyn gyda’r gorau yn y byd, sy’n mynd ati i gynnal ei adfocatiaeth ei hun fel mater o drefn.
Plant a phobl ifanc – Polisi’r CPS ynghylch erlyn achosion troseddol yn ymwneud â phlant a phobl ifanc fel dioddefwyr a thystion
Mae’r ddogfen hon yn ymwneud â phlant a phobl ifanc sy’n dioddef trosedd, neu sy’n dystion mewn treialon troseddol. Mae plant yn ddioddefwyr neu’n dystion mewn llawer o’r achosion y byddwn yn delio â nhw. Mewn unrhyw achosion o’r fath, byddwn yn troi at y polisi hwn.
Bydd plant yn mynd gerbron llys fel diffynyddion hefyd. Y gobaith yw y bydd y rhai sy’n eu cefnogi yn cadw at egwyddorion y polisi hwn.
Cyfweliadau gyda thystion cyn treial: Côd ymarfer
Mae’r Côd Ymarfer hwn, a gyflwynwyd gan y Cyfarwyddwr Erlyniadau Cyhoeddus, yn rhoi arweiniad i erlynwyr sy’n cynnal cyfweliadau cyn treial gyda thystion mewn cynllun peilot a gynhaliwyd yn Rhanbarthau’r CPS yn Swydd Gaerhirfryn, Manceinion Fwyaf, Glannau Mersi a Chymbria rhwng Ionawr a Medi 06.
Os bydd arnoch angen rhagor o wybodaeth, cysylltwch â’r Ddesg Gymorth Polisi drwy ffonio 020 7796 8471, neu drwy e-bost, yn HQPolicy@cps.gsi.gov.uk
Cyfweliadau gyda thystion cyn treial: Côd ymarfer
Adfocadau Dioddefwyr– Cyhoeddi Protocol Barnwrol
Yn berthnasol i droseddau llofruddiaeth neu ddynladdiad a gyhuddir ar ôl 24 Ebrill 2006, mae cynllun peilot Adfocadau Dioddefwyr yn caniatáu i deulu dioddefwr wneud datganiad yn y llys ynghylch effaith y trosedd ar eu teulu.
Wrth wneud y datganiad hwn, gall teuluoedd dioddefwyr ofyn am gymorth gan erlynydd y CPS neu gan adfocad annibynnol gyda hawliau ymddangos Llys Uwch. Mae Adfocadau Dioddefwyr yn cael eu treialu yn Y Llys Canolog Troseddau, Llys y Goron Birmingham, Llys y Goron Caerdydd, Llys y Goron Manceinion a Llys y Goron Caer-wynt.
I gael rhagor o wybodaeth am y protocol, ewch i wefan Barnwriaeth Cymru a Lloegr.
Teithiau rhithwir i ddioddefwyr a thystion
Mae CJS Online wedi datblygu taith rithwir ryngweithiol i roi gwybodaeth am broses y System Cyfiawnder Troseddol fel y mae’n ymwneud â dioddefwr troseddau.
Mae’r daith hon gan CJS Online yn ceisio eich arwain trwy’r system cyfiawnder troseddol yng Nghymru a Lloegr o’r adeg y bydd yr heddlu yn cael gwybod am drosedd, trwy ymchwiliad yr heddlu, penderfyniadau’r erlyniad, prosesau’r llys, a dedfrydu, gan egluro rôl y tyst ar bob cam.